諗住住2日，洗下衫啦，兼且昨天咁好天，點知尋晚半夜開始下雨，D衫濕晒，慘！今朝繼續食香港帶來嘅物資做早餐，之後就衝著風雨天出發。
（尋晚好好天㗎，重影到月亮添。）
今日好大雨，金圈之旅去邊個先好呢？因為路程差不多，最後決定了先去Pingvellir National Park。此處對冰島人來說很具意義啊，因為據說於公元930年，全球第一個民主國會就係係呢處成立嘅。重有就係係呢度可以見證到美洲版塊與歐洲版塊每年以2.5cm分離的情況。冰島確實是不斷地被撕列成2半，一半美洲，一半歐洲，好驚嚇！今天超大雨大風，再加上凍，本來很短路程都用上了很多氣力，上到山頂，重好似香港掛十號風球咁大風添，咩雨衣、Goretex衫褲都好似無咩用咁，濕晒，由外至內，總之好唔舒服。參觀完Pingvellir Church，就打道回車走人。
（大雨到濛濛瀧瀧。）
（山崖就是美洲版塊啦吧！）
去下一個點前，去左油站N1快餐廳醫肚，下一個點就係Geysir Hot Spring Area嘞 。早知去到Greysir先食啦，個度有間個樣好正嘅餐廳呢！ 去到呢處停左雨，只有毛毛雨喎，真好。非常多人都係Strokkur旁等呢個間歇泉爆發啊，因為Lonely planet話佢係全球最可靠嘅，等6﹣8分鐘就等到佢爆㗎啦，而且都噴到有15米高添㗎，相比起多年前去黃石公園等Old Faithful爆發，快好多又有保證，兼且可以影多好多次相，超讚！（呀，記起有個景象超驚嚇，有個2﹣3歲鬼仔穿過圍欄跑左入去個間歇泉，好彩佢呀媽都算執得佢快，唔係真係大大獲啦！）
（都噴得幾高吓！）
離開Greysir area就一直開去Gullfoss啦，又開始落雨啦，今次係又細密又大風嘅四方亂飄嘅風雨，總之係無可能擔庶著雨衣又濕晒個種啦，塊面都濕鬼晒！Gullfoss又係一個非常大型嘅瀑布，遠看成架大空飛船咁，都好特別。呀，冰島真係好多瀑布，流了幾萬、幾千定幾百年呢？究景呢個全球第三大冰帽D冰又重可以頂多幾多百、千、萬年呢！？
（我覺得似太空船呵！）
今晚反Summerhouse嘆牛仔骨，飲Viking啤，正。不過要浪趕D衫先！明天要起飛。
沒有留言:
張貼留言