第六天，2013-08-16，星期五：Myvatn -> Husavik (天晴，後轉微雨)
Dimmuborgir [74.1km]  -> Dettifoss [30.1km]  -> Ásbyrgi [62km]  ->  Húsavík [800m] 

今早大家都吃了個豐富美景自助早餐（落地玻璃窗面向米湖），充滿電後又起行啦。首先去Dettifoss和Selfoss，有２條路去，問了靚仔長櫃，佢好好咁利用餐廳嘅大地圖介紹我行左手邊的862公路，唔好行864喎，因為862正面望Dettifoss靚D嘅，但要注意之後上Asbyrgi條碎石路會難行好多，叫我地開慢ｄ就得。我們架車係４驅車喎，梗係唔怕啦（其實都擔心佢死死地火），Anyway, Gogogogo。

（D早餐都好好食啊！加上背後美景，好幸福呢！）

據Lonely Planet講，由米湖至Dettifoss段862公路好像剛翻身過喎，我想都係嘞，因為條路好靚好平坦，連大巴都開都好飛快添。去到Dettifoss，離遠已看見了水花四濺，由停車場走一段約400米的小徑後，即刻感受都瀑布嘅威力嘞，原來此仍全歐洲最大排水量的瀑布，好勁呢！今天好彩啦，碰巧有陽光，所以看見了水花四散形成的彩紅添，好開心呢！我地當然又係度逗留左好長好長時間影相啦！不過，原來Selfoss係正隔離，所以都順道過去參觀埋。

（Milky Grey Waterfall and Rainbow - really great!)

(其實有D驚驚。）

（Selfoss)

(再來一張。）

我地（其實只有我）真係瀑布狂，因為實在逗留了太長時間啦，要快趕D去較早前Book好3:30pm在Husavik出發的觀鯨團嘞，所以一於在Dettifoss野餐當午餐啦(其實旁邊有好多遊客跟我們一樣都在野餐喎。)。餐後立即起行趕路，繼續向北行，不過條862公路開始變得又窄又爛又多碎石，不時還有對頭車添，所以無可能開得快，以為有充足的時間去Husavik又變得更加緊湊起來。為了趕時間，所以錯過了參觀Asbyrgi canyon峽谷呢，嗚嗚嗚。不過，去到Husavik及整理裝備後，原來時間已經剛剛好，因為開始上船嘞，如果去了峽谷可能遲到兼Miss左班船，都算好彩。

因為上年剛去了西澳出海觀鯨，而且看見了非常多的Humpback Whales在海上出沒，有大有小，有媽媽領著幼鯨的，當時帶領的船員已經一早說：「You can see everywhere」。由於Husavik被稱為歐洲最好賞鯨地區之一，事前看Lonely Planet說此處有多達十一種不同品種的鯨魚到訪，所以真是帶有點期望的，起碼也給我們多看一種品種吧，例如Minke Whale，因為比較常見，如果見得到全球最大哺乳類動物﹣Blue Whale就最正不過啦。不過，希望越大，失望越大，2.5-3小時的旅程，只看見一條Humpabck Whale，而且牠比較害羞，經常深潛，為了滿足遊客，幾條船又不停追牠，想近距離接觸（其中一艘橡皮快艇開得太近了，連我船的水手也有點不滿，因為太不專重大自然了）。還好，牠跳了上水面2﹣3次，距離還不算太遠呢。

今天晚上入住 Sigtun Guesthouse，一般啦，因為要Share bathroom嘅。今晚去了Salka 餐廳享用晚餐，海鮮出名呵，當然有叫啦。咁又完成一天嘅行程啦！

第五天，2013-08-15，星期四：Varmahlio -> Akureyri -> Myvatn (天陰，驟晴驟雨)

Varmahlíð [61.6km]  -> Öxnadalur [84km]  -> Goðafoss Waterfall [47km]  -> Mývatn [1.7km]  -> Dimmuborgir

清早6時許起床，各人自已煮個公仔麵做早餐，我和幾位團友就再浸多次戶外hot tub享受多次先再起行。今天要去的景點較多較出名，所以要抓緊時間，所以一早便離開。開車後，心想沿著1號公路走會好易認﹑好容行，所以忽略了即時Set GPS和認路，重掛住望風景、看書溫習下個景點的資料，點知得不償失，結果行錯路，白白浪費了至少30至40分鐘的時間。

之後加快速度，開了百多公里路程後到達冰島第二大城市，Akureyri。在鎮的入口先加油，隨即往Akureyri downtown作快速的參觀。誤打誤撞立即找到Akureyrakirkja church，教堂很宏偉，跟首都出名的Hallgrimskirkja church出自同一設計師－Gudjon Samuelsson的設計（首都的教堂我們最後一天才會去）。再往購物街道閒逛，參觀比較出名的Viking shop。Shop門前有２個核突的Viking公仔，門口再放了２隻北極熊作生招牌，鋪內紀念品非常多，喜歡shopping的朋友一定流連忘返。

往Bonus補給食物後，便前往下一個景點 – Godafoss (Waterfall of the Gods)，到達後先來一個簡便午餐（車上吃，好似走鬼檔），便往瀑布的左手面走過去，作近距離的接觸。據說約在公元1000年，一位法律人仕（law speaker, Porgeir）要決定冰島的宗教信仰，經過２４小時的沈思和默想後，決定了基督教為國教，回家途中，經過瀑布，便把古北歐人那些非基督教雕刻都拋了下去，瀑布因而得名。雖然此瀑布未必是冰島最大最宏偉，但對我們來說已經是非常壯觀美麗了，所以都花了不少時間拍照呢。

由於仍有２個景點要去，所以先出發往今晚下榻的米湖東部Dimmuborgir Guesthouse去Check-in。入住的地方剛好在Dimmuborgir(黑色堡壘的意思，其實是巨大的火山岩石群的地貌也)對面，又剛巧進入了Dimmuborgir的景點範圍，所以先往此點參觀。進去後，有多條行人徑（Walking trails）可供選擇，由於仍未Check-in及還有一個重要景點未去，我們又喜歡多點時間拍照，所以只選了黃色的Big Circle（800m，２０分鐘；起初想行Church Circle，不過淨行都要１小時，其實行了一會後，覺得火山岩的地貌都是差不多呢！）。在此處離遠看見了Hverfell死火山口，上面有很多人在山頂喎，真的很想登上去呢。據說來回都要３個小時，時間一定不夠，有緣再會吧（不過都好渺茫）。

（背後就係Hverfell啦，好想登上去呢！）

Check-in Dimmuborgir Guesthouse放下行李後，立即開車去Namafjall。車爬過山領後立即看見了色彩斑斕的地貌，原來都是由火山岩石上的裂縫及噴孔爆發出的氣體所形成的，好美麗啊！不過硫磺味就超級強烈，好難頂啊！好彩小孩（還是媽媽呢？）都有帶備口罩，果然醒目！由於硫磺氣體四方八面洩出，雖然大家都不敢超越圍堵的繩索，不過下微雨又刮風，相信大家的衣服都被那帶有刺激性的氣味覆蓋了。流連良久，最後就往８１８米的Krafla火山口進發，此仍一個環形火山，火山口已填滿了美麗的藍綠色雨水。我們都行了上火山口的最高處，欣賞嘅美麗又壯觀的自然境色。書上說火山仍被認為是一個活火山，但我們看很死很沉悶喎！雨又開始轉大了，我們只好折返回Guesthouse和預備晚餐。在Guesthouse跟主人的其中一頭牧羊犬玩，很可愛呢，我們把吃剩的羊骨都奉獻了給牠呢，這個月應該未需要放牧吧，好好享受一下吧！哈哈！

（可愛又乖乖的牧羊犬Valur。)

第四天，2013-08-14，星期三：：Osar  -> Varmahlio (天陰微雨後轉晴)

今天Hostel有包早餐，安排在對面馬路的一個蒙古包內，都幾特別啊。早餐以自助形式進行，有多士、芝士、火腿、番茄、麥片、鮮奶、果汁、咖啡呀呢D基本野咁啦，還有D夾餅，有大有小， 都幾好味喎，重暖暖地添，我食左好多塊呢。醫好肚後，又要上路啦。

下一站Varmahlio距離比較近，今天可以輕鬆D行。再次轉出1號Ring Road後，向著Vatnsdalur，Blonduous及Varmahlio進發。Lonley Planet介紹可以考慮沿著721公路作快速的6km detour，目的去看一間石砌教堂Pingeyrar(Stone Church)。本想拍幾張照就走，但可能此地點要detour來的關係，又可能我們是今天第一批遊客，所以我們一下車，己經有位職員出來迎接我們，他作了簡單的講解後，說可以作我們的嚮導，當然要收費啦。不過收費不貴，此處又是我們第一間參觀的教堂，要收費才可以進去參觀，所以就一口答應了。原來教堂建於1860年代，黑色的石頭用了多年由老遠的對岸用船運過來的（他指了給我看，真的很遠，好難形容，總之就係Mission Impossible既感覺啦），所以興建了很多年才完工（忘記了數字，Sorry)，以前是修道院，僧侶使用的。據嚮導說（嚮導名字都忘啦，好難記既），現時此教堂約1個月先有團體用一次喎）。

流連了都一段時間就走，下一站係Blonduos，原先想訂此處的Cabin，不過後來訂了Varmahlio的Hestasport Cottages。好彩啫，因為大定都很喜歡後者啊。又係N1油站旁的餐廳醫肚，我地都幾懶搵好野食喎（其實要多謝各位團友遷就和照顧2位小孩的飲食喜好就真）。食完就走往油站旁的河流去散步（不過好鬼死多羊臭臭），又見到另一間教堂，今次呢間前衛新潮很多，不過入去都係要收費，今次唔需要啦，係外面「莊」下得啦。起行前，幫了架車大清洗，因為之前行泥路，架車太污漕啦。

到Hestasport Cottages前，又見到一個4葉草標誌，即係又有景點，好，即去。原來又係一間教堂喎，名叫Víðimýrarkirkja church，呢間幾有特色，教堂頂部鋪滿草堆既，好特別呢。旁邊有幾頭馬，好乖，我們（包括後來來的一大團歐洲人）都同佢地玩得很開心和玩了很長時間呢。Hea行之下，不經不覺就到達了今晚入住的Cottage的check-in辦事處，那時約下午5時多吧。一下車，就看見了香港特別行政區的區旗高掛，另外三張是德國、西班牙和以色列的國旗。訪問之下，果真是因為入住4間不同Cottages的人的國藉來的，很貼心啊，琳晒啦！

呢間Cottage好正呀，有優美的風景，我們九人入住最大個間，房間很舒服，有一個很大的廚房，團友們又可以大展拳腳啦。最正係有一個用石堆砌的戶外暖水池Stone hot tub，Cottage為每人都提供了浴袍，浴袍上還有附上一粒朱古力，貼心到呢！有美景Spa喎，我們每人當然都有浸啦，美中不足沒有電視機，我們看見旁邊較細小的Cottage好像有喎，不過算啦，可能都係得一個講冰島文既台，無咩所謂啦。今晚主食香港運來的烏冬作晚餐。

（開心都彈起！？）

（風景都OK啊！）

（入黑前，都成10點幾呵～～）

（居然有特區區旗～～～讚啦！）

第三天：Arnarstapi (252km) -> Vatnsnes Osar Youth Hostel (天陰下大雨，後轉微雨)

上午求其吃過Bonus方飽做早餐後便離開， 9時許先到訪了Hellnar，不過National Park Museum仍未開門，只好離開。一直開車穿越Snæfellsnes 半島，經過Snaefellsjokull National Park，通過山嶺時，超級大雨大霧，視野糢糊，能見度只有數十呎，完全看不見美麗的Snæfellsnes冰冒，Lonely Planet話此段574公路好美麗的，完全無辨法看見，只擔心前方有沒有對頭車，因為視野真的很差勁。

(在Hellissandur回望Snaefellsnes冰山，還算隱約見到呢！）

經過了多個小鎮，包括Hellissandur，Rif，Olafsvik，Grundjordur。其中去了Grundjordur的information center參觀，找他們幫忙通知今晚下榻的Osar Youth Hostel，我們有可能會late check-in，再去銀行多換一些冰島克朗IKR。銀行職員很輕鬆喎，因為無咩客戶，兌換率比第一天在機場的要好，但是要收手續費，所以最後都係差不多。不過，銀行有咖啡機免費任飲，我和友人都各飲了一杯，所以點都係賺左，正！

（Information Center的擺設，挺古色古香的！）

今天午餐又係去油站旁的快餐店攪掂算，今次是Stadarskali的N1油站，下微雨，好凍。醫完肚繼續沿１號Ring Road進發，再轉７２公路進入Vatnsnes半島。行了一小部份好的柏油路後，後轉黃泥碎石路，不久就到達半島東部，參觀被lonely planet稱為冰島其中一個最大海獅嶺地的地方，Hindisvik。泊好車後，行一段不算很長的路就可以到達觀看海獅的小屋（Hide），海獅看到了，不過途中看見的北極燕鷗更多更熱鬧，因為很多成鳥都在育鶵，而且距離很近，不怕人，所以令我流連良久，還拍了很多飛羽照片，很開心哩！

（好辛苦啊，加油啊！燕鷗父母）

之後去到另一個景點，Hvitserkur，觀看奇異的石山。再多行不久就到達Osar Youth Hostel了，一個很好的Hostel，管理人亦是農場主人，養牛﹑羊，種小麥呀咁，再兼顧埋Youth Hostel既生意，唔知係咪好有錢既呢？Check-in及放好行李後，即往Youth Hotstel對出的山坡走下去，因為離遠已經看見有非常之多的海獅在對岸。海獅都在休息、又些游得很近我們。看了不一會，就回Hostel製作今天的晚餐醫肚，今晚有烤羊肉食，再加上Viking beer啤一啤，好正。咁就結束了第三天的行程啦。

(有一隻望個來啊，你看得到嗎？）

（雨中嘆世界的一對羊咩咩，好可愛呢～～）

（不過，最後牠們的下場卻是這樣，不好意思啊 ：（）

第二天：Blue Lagoon [194km]-> Snæfellsnes peninsula [42.3km] (經Borgarnes ) -> Arnarstapi(天晴轉陰及下微雨)

因為Jet Lag原故，今天５時多已經扎醒起床，再走訪600米通道拍Landscape照。今早天氣很好，能看見日出，清晨境色又有另一種美麗，天氣很清涼，有點冷。回酒店去嘆了一個很飽足的早餐，首次試了冰島十個建議食品之一，Skyr酸乳酪，比香港食開ｏ個D“傑”D，我都算喜歡食Yoghurt，所以個人覺得幾好食。之後當然要來個早晨面膜Spa啦，今次就在酒店的私人Lagoon再次享受浸泡。雖然私人Lagoon比公眾的細，但是少很多人，亦有提供水泡，所以浸得分外鬆容自在。

食飽嘆夠，早上11時離開Blue Lagoon。我們（其實主要是我）選擇了順時針方式先北後南環繞冰島一圈，由於冰蓋（全世畀第三大的Vatnajokull）﹑冰川﹑冰山等都集中在南邊，所以今次決定順時針走，即是先平淡一些，驚喜放在後頭，逆時針則剛好相反，先驚喜，後舒適，如何選擇就看個人喜好了 。

開車擦過首都Reykjavik邊皮，再沿1號(Ring Road)公路向北行，經過Mosfellsbaer，通過Fjord Hvalfjorour的隧道（建於1996-98年，5.6公里長，165米深），很快就到達小鎮Borgarnes（約2,500居民）。先去Bonus supermarket購買未來數天的飲食物資，再去N1油站的連鎖快餐廳醫肚，九人叫了2個Pizza，可樂大家說好好飲喎，超夠氣，再買２張N1 IKR10,000的油卡，因為聽說有些油站無人的，後來發現除了無人之外，有些會好早收工或好遲開工，所以買定N1油卡（很多地方都有的local油站），就可以備不時之需啦。

午飯後再出發，一直往冰島東部Snæfellsnes半島進發，目的地是Arnarstapi，沿途境色很美，見到很多瀑布。約下午４時到達Arnarstapi，開始下著微雨，今晚下榻Snjofell GuestHouse (Shared bath)，有點失望，房間小，沒有廚房煮食，只好把今午在超市買的東西留待後幾天食了。Arnarstapi是一個魚村，我們放下行李，開車至村的盡頭，沿著Lonely Planet介紹通至Hellnar的2.5km小徑進發(行畢全程要40分鐘)，一路沿著海岸線走，有很多被侵食的海洞及石拱門(Rocky arch known as Gatklettur)，很壯觀，山崖有很多飛鳥和鳥巢。不過由於非常大風﹑又冷又下雨，最後行了不久，有點點饑寒交迫感覺，所以經過Guesthouse就決定打道回府，今晚在Guesthouse內非常窄小的common area用滾水“錄”公仔麵和火腿當晚餐後就休息了。

第一天 (Part ２)：香港（00：25）＞芬蘭Helsinki(06：30)＞冰島Keflavik Int’Airport  

舞了一大輪行李搬運和調校GPS後，立即開車前往今晚下榻的Blue Lagoon ﹣Clinic酒店。Lonely Planet話去冰島唔去Blue Lagoon浸下，行程就好像欠缺咁D野喎，所以梗係要去下啦。 上網查過，入住此酒店可包第二天早餐、多次免費進入公眾及私人Lagoon，亦包浴巾、浴袍，雖然貴，但可以係晚上及第二天早晨浸兩次浴，再做埋火山泥面膜Mask(Silica Mud矽土泥)，當補回條數。況且捱左14小時長途機後點都要嘆下豪下先得，無謂虧待自己，所以一早就訂好房間（雖然貴但亦好快爆）。另外，附近好像無咩好食，第一天亦不宜過於操勞，所以亦預早訂埋大浴場旁的餐廳食晚餐。

Check-in酒店後，轉頭已帶晒泳衣趕去公眾Lagoon浸浴，從酒店走路過去要經過600米的通道，約10分鐘路程。沿途好靚，石仔路兩邊都係熔岩地貌Lava field，加上奶藍色的溫泉浴場水（Milky Blue Spa)令我地不斷留連影相，所以行左好長時間先去到公眾浴場。入場前要先洗澡沐浴，由沐浴場走出去溫泉時要忍受短暫寒冷的天氣（開始入夜估計只有10度左右）。好凍啊，不過好彩酒店有提供浴袍，可以擋下風。泉水約38度，浸落去剎那特別舒服，有些近出水口的地方溫度高些更舒服，當然推滿了人啦。Lagoon地貌也很漂亮，走在木地板建設的通道、小橋，享用人造溫泉瀑布提供源源不絕的水力按摩推拿，進入蒸汽室享用桑拿浴，感受蠻不錯。當然少不了塗上大量的矽土火山泥上面呀﹑頸呀咁，做下天然面膜Mask啦，唔蝕底呀嘛。據說其礦物質可去除死皮，護膚功效一流，浸完好似BB咁滑喎，梗係狂揸啦，不過過左一陣就硬晒係塊面到一舊舊，有D唔舒服，又幾“乸”面吓。

浸到手指巢晒皮就上水，去食晚飯。有段小插曲，因為自己溝通得不好，忘記通知太太﹑亞女晚膳位置，要他們等了很久及走了600米通道來回２次，真係萬分抱歉，下次唔敢啦。晚餐很豐富，多謝團友的悉心安排，點了很多好味的餸菜，重預早用Email預訂了一個超好味的生日蛋糕，外觀很漂亮又好食，今餐理單應該唔野少，不過朋友請，我又無看單喎。再次多謝晒各位團友，之後既行程我會努力溫書做功課，盡量多作境點介紹ｏ架啦（其實不外是瀑布﹑火山岩﹑冰川呀重重覆覆咁，難唔到我既，放心，小費要比多ｄ喎）！最後經歷近38小時無咩好休息（再加上泡過溫泉）後，２小孩終於體力不支在飯桌前睡著，幸好體貼的侍應開車送我們會酒店（他有２小孩，大的１４，小的８歲，下個月經德國去越南夏龍灣旅行喎），唔係都幾狼狽。咁就結束了漫長第一天的旅程！

第一天 (Part 1)：香港（00：25）＞芬蘭Helsinki(06：30)＞冰島Keflavik Int’Airport 

晚上8：30出發，乘坐Finnair芬蘭航空，清晨00:25起飛往芬蘭的Helsinki（10小時45分，期間看了3套戲，睡了一會），再轉冰島航空Iceland Air飛往 Keflavik International Airport（3小時25分，看了幾套介紹冰島的影片，不過要自備耳筒，所以只有畫面無聲，亦無野食（小孩2樣都免費提供）。）。中間轉機等了8個小時，名符其實等到頸都長。不過，今天是我生日，可以過一個超級長的生日（24＋8小時廷遲＝32小時），諗翻都好鬼死正喎，係芬蘭重有生日卡收添！

芬蘭上午時間６點幾就落機，8小時轉機不算長又不算短，外出時間不夠只好係機場慢吞吞四圍逛，好在有免費Wifi和叉電（電話無電不過又無帶叉電器啊ｘｏｘ），但是上不了MyTV.com看劇，因為地域問題喎，親友就上網上Youtube看上一輯神探咖利略。由於機場無咩野好食ｄ野又貴，所以簡單「搜集」了些汽水﹑生果﹑曲奇﹑三文治和包包呀咁，當午餐，其他團友豪ｄ，食壽司。下午約４時到達冰島國際機場，隨即去Duty free shop買了半打Viking Beers，因為聽說呢度Tax free平ｄ噃（不過自己對啤酒麻麻，又只得我和另外一位朋友飲，結果到最後一天先飲得晒）。拿回行李時發覺很奇怪，既無行李Security Check，又無Counter Check-in，更加無人於Passport蓋冰島的入境Chop印，掂行掂過就出了機場，有ｄ唔慣。

一出機場立即去Hertz Counter辦理一早訂定的９人4x4柴油棍波貨Van－Toyota Hiace，一直懷疑此車可否同時乘坐９人和放下９件行李（大中小各３件），原來真係得既，不過架車好殘，行了１３萬公里，４條車胎換細左，唔合比例，後備胎重生晒銹添，車頭擋風玻璃防霧功能又 “神神地”，後來用２波起動時更加會發出“火羅”味，一路開一路擔心燒“極力子”捱唔完全程，似足十多年前係亞拉斯加租個架老爺美國車一樣。不過最衰係勁食油，晒左我地好多油錢！全程又看見好多人租VW Golf 第七代（出了一年既車款）及6代Polo新車，上年去西澳都都租到架現代i30新車啦，重可支持iPhone聽歌。睇O黎租細車好ｄ，車款好似新好多，可能ROI好ｄ掛！另外ｏ個個GPS又勁難用又渣，輸入名稱後經常找不到要去既地方，好彩團友仔事前做好功課記下要去地方的GPS方位，輸入坐標就比較準確讓GPS指點出目的地，立即無晒難度，讚！不過最後一天晨早趕去機場都係比佢點左條掘頭路我地行，加上天未光又落雨，最後睇路牌先攪拈，十多分鐘車程行左半粒鐘，想起都驚險萬分！

冰島及格凌蘭十五天之旅

 (2013年8月11日 – 2013年8月26日)

前言

今次旅程好玩嗎？很多朋友都問，可算是吧，可能因為之前已看過了極光、登過冰川、看過了座頭鯨，熱噴泉等，少了一份新鮮感咁啦。況且經常陰天下雨、刮大風又濕又冷，影張好D照片都有點困難。（不過這就是冰島天氣呢：因為冰島人說，你不喜歡現時天氣嗎，等會就會不一樣的了。）。 最遺憾的是看不到Puffin，也看不見小鬚鯨（枉論抹香鯨和藍鯨了），又忘記查一下是否可以參加一些登火山看看熔岩噴流的Guided Tour。算吧，旅行有點遺憾可以激起下次旅行的慾望呢，哈哈哈。不過，今次算是第一次看見了大冰山於海上飄浮，又登陸過格凌蘭探望過愛斯基摩人社區和看見不少的Huskies（愛斯基摩犬），最後一天還有幸遇上冰島馬拉松嘉年華會，遺憾中也該帶點感恩吧，所以感受還算好呢。 （掩飾昂貴洗費的自我安慰之言， 呵呵呵 ）。

話說今次旅行完回來很懶，原本想一回來便開始寫遊記，當做個記錄又好，分享下相片和感受又好，但遲遲未開筆。心想反正只有自已和同行親友看，慢慢未遲（居然不擔心記憶流失？＞o＜）。又想試下開個Blog玩下（唔係咁遲鈍呀？），但發現Yahoo年底停產支援Blog，立即興緻大減。但是居然有「粉絲」（其實都係2位年輕親友）問幾時有遊記看，重燃起動筆的決心。又話說中文大家會易看點，所以今次決定以中文去書寫，因為呢幾年工作上寫中文比寫英文的多，不過錯別字卻又非常之多，當練習下都好。由於打字慢﹑想文法更慢，所以估計「起貨」會好鬼死慢慢慢慢（還要睇波，今年熱刺好似好強啊），2位親友請放長條頸等我慢慢慢慢地完成十五天行程遊記吧（連相）。喎呵呵（由於已忘記如何寫網頁，所以決定放在Facebook算了）。

今次行程一行九人，名為「冰島格凌蘭九男女之旅」。繼2012年暑假十三天西澳之旅開車3千9百公里，今次不經不覺都開了成3千多公里，認真詐舌（今次我沒有開車，因為要搓棍波，怕怕地，所以辛苦晒朋友姐夫）。由於七、八月是冰島旅遊旺季，所以早於二月已訂好起行日子和機票（少弟生日出發，嘻嘻嘻），後來就逐步訂民宿、Cabin、Cottage等。 再之後就搜集資料個D例行o野啦，咩Lonely Planet，Rough Guide，圖書館借書及看別人的Blog及Forum一定唔少得啦。