第十五天（終結篇），2013-08-25，星期日： Keflavik＞ Helsinki > Hong Kong (天晴)。

第15天，即最後一天，今天基本上是沒有行程的，因為要坐晨早7：30的機。雖然開車車程應該只有15至20分鐘，不過大家都5時起身，5時半執拾完即走人！以為用GPS Search好左“國際機場”實掂啦，點知比佢點左條掘頭路我地行，加上天未光又落緊雨，視野濛糊，大家都好驚！最後都係要睇路牌先至攪拈，十多分鐘車程行左半小時。去到機場又搵左一陣先搵到歸還車的地點，還車與取車時的地點不一樣的，天黑黑很難找，最後只好兵分幾路，有些還車，有些check-in，有些看顧行李。大清早機場已經人山人海，想必是呢幾天馬拉松加嘉年華會的緣故吧，要自己先用機場的Kiosk去check-in左先，大家雞手鴨腳最終都攪掂，不過D坐位亂晒龍，無計，入左閘先慢慢攪，總之走左先算。Check-in完要排隊寄行李，嘩！條龍好長，心想都有幾百人，好擔心趕不及呢！ 不過排排下又好快喎，應該係大家都Check-in完先寄行李的關係嘞。雖然最後都順利過關走人，不過依家想番轉頭都幾驚險萬分！

(上機先經芬蘭再返香港了。）

入左閘，寄埋D明信片先先上機離開。之後坐幾個鐘機，無野食無娛樂（如以後有朋友坐此程機的話要記住自備耳筒啊，我們都無帶呢！），13:55芬蘭時間又番到去到Helsinki，轉16:40機返香港，今次又係坐10個多小時機，但唔知點解，成程機我都睡不著，卒知煲左4套戲，返到香港時間7:25，溫溫鄧，謝晒！好彩請多日假，唔係真的吃不消！不過有團友仔因工作需要迫於無奈要趕返工，真係搵食艱難呢！

（下面係挪威啊！）

咁就結束了15天冰島及格凌蘭十五天之旅咯！時間過得真快！完成這篇遊記也足足花了1個多月呢，因為中間發生了很多事，精神集中不了，還好靠照片記下了所有點滴，併圖式地叫作完成吧！記下精彩回憶永遠是美好的！

（超可愛的冰島小妹妹！冰島，一個很好的地方，很值得遊覽！）

第十四天，2013-08-24，星期六：City tour at Reykjavik (天陰有微雨)。

早餐繼續即食米粉，志在清晒D貨，食左咁多日，睇來大家都無咩點肥到，都算好彩！明天就坐飛機返香港啦，完成今次冰島及格凌蘭十五天之旅，真是快樂不知時日過。食完早餐就出發，由Sandgerdi開車約40分鐘到達今天第一站Hallgrimskirkja教堂，好彩，星期六泊車不用入咪錶！

(小心起見，問了周圍店鋪職員，確定周未不需要入錶。）

在這所外觀好像太空穿梭機的教堂流連了好一段時間，除了是因為外觀宏偉之外，內那建築也很壯嚴美麗，入去參觀又不用收費，真好。碰巧有詩班練習詩歌啊，還有mini Orchestra小型樂團伴奏，配上教堂的5275-pipe organ，嘩！嘩！嘩！好好聽啊，悅耳繞樑， 單一支Flute的效果已經聽出耳油，完全不需要任何電子設備，現場效果一流！唔知以後西九嘅設施做唔做到咁嘅效果呢！？

（真係好好聽㗎，不過唔知歌詞唱咩，哈哈哈！）

（太空穿梭機起飛。）

今天主要在Reykjavik首都Hea遊，無咩特別plan，下站選了去寧靜的Tjornin湖邊遊盪。不過今天一D都唔平靜， 因為撞巧今天係冰島馬拉松日，晚上就是Cultural Night (Menningarnott， 據說差不多1／3冰島人都會走出來慶祝一番)，真是無心插柳，我們真係超好彩啦，整個首都熱烘烘，冰島家庭都好像全部出來似的，充滿於街道上，扶老携幻，我們還真幸運，事前完全唔知的呢！

（見唔見D參賽選手呢？）

（近D嘞，見啦掛！）

（再近D，唔知呢組係6至8歲，還是8至10歲組呢，點都好，加油啊！）

多條街道都封鎖了給比賽人事， 繞過跑步人潮，先去Tjornin湖邊餵飼下海鷗，輕輕鬆鬆再去旁邊City Hall（Radhus)參觀一下，行行下不經不覺下午2點，又要醫肚啦。四周都人山人海（我想平時在冰島不常遇見的吧），很難搵食，行行下最後係在馬拉松終點站對開處找了一家叫PISA的餐廳吃自助午餐，10歲以下小朋友免費喎，我們有2個，呢次賺晒啦（亞Q精神），還可觀看廚師即席製Pizza，製完即食！其他食物都OK啦，團友們最喜愛個雜菜湯，我就like雪榚嘞！

（拍鳥多年，感覺這張BIF最樣衰！）

（比賽開始了3個幾鐘了。)

（就係呢間Pisa嘞，前面就係終點嘞！）

（雜菜湯是團友的至愛！）

（即製Pizza新鮮熱烘好好味！）

食完行出街就見到有人扮維京人巡遊，真係普天同慶嘉年華啊！我們之後走去海邊，拜訪一下建於1986年的Sun-Craft 半魚骨半船型雕塑，行到都累累哋，所以決定返回Sandgerdi Cottage煮晚餐，途經Bonus，買點食物回香港自用和作手信。晚間看電視直播首都音樂會的情況，有很多不同表演者，還有放煙花添，不過講冰島語，唔知UP咩！睡前當然有嘆番個Hot Tub浴先啦！

（維京人巡遊！）

（與我飛吧！魚骨雕塑。）

第十三天，2013-08-23，星期五： Kulusuk, Greenland ＞ Reykjavik (天晴)。

約7時起床，落海邊影下相，咦！今天水漲啊，昨天的浮冰都浸左係水裡面啦！約8時去吃個豐富自助早餐，之後去Souvenior shop買下明信片寄返香港。

（個天好藍，D海水都係。）

（大、中、小Monsters）

（寄明信片。）

吃過早餐就往酒店的另外一邊trekking一下，去看超大浮冰，浮冰碎裂的聲音都幾嚇人。今天超好天，又係海天一色，拍了很多照片，很暢快。

（水漲把浮冰都蓋過了。）

（極北天氣下的野花啊！）

之後坐Greenland時間14:05機回冰島，時差關係，17:55回到冰島首都，去到冰島又係落雨天，又凍又濕好唔舒服 。今、明2晚都入住Sandgerdi Cottage，原因是後天一大清早坐07:30的機回香港，而此處開車十多分鐘可到國際機場，比較方便。

（簡陋但仍算忙碌的格陵蘭Kulusuk機場。）

（我地走咯，格陵蘭，後會有期！）

於Reykjavik內陸機場落機後，隨即去Sandgerdi，約45至50分鐘車程到達目的地，Check-in住處後，即去附近的Vitinn Seafood Restaurant享受晚餐，雖然只有3枱人（我地9人，其餘是4、2人），不過出菜超慢，食完之後夜嗎嗎。

（屋主很好人，開車帶我地去晚餐的餐廳。）

（海鮮很美味，不過出菜太慢！）

晚上當然嘆番個Hot Tub浴先去睡咯，舒服好多呢。呵呵呵！不過由於先前屋主示範過調較水溫，回來後水溫超熱，最後花左好長時間先再調啱水溫！

（今次旅程最後2晚都有得浸溫泉，爽！）

第十二天，2013-08-22，星期四： Reykjavik > Kulusuk, Greenland  - Part 3 (天晴)。

食過自助午餐，飽晒！跟住行去愛斯基摩人的村落，要行30至40分鐘，食飽當做運動啦！沿路已經見到一D愛斯基摩人媽媽，帶住2個小孩，又有一位開住工程車都向我們打招呼，好友善，我地就當然有回應啦，不過都係掛住拍風景照多D。行過了小山領，見到一個冰川D冰未融，都好大下，全部人跑晒去玩餐飽，滑冰、掉雪、影相呀咁啦！

（與大自然搏鬥共存的愛斯基摩村落，很值得專敬吧！）

（冰川很美，背後風景都很美！）

入到了只有4百多人的愛斯基摩人村落，見到不少當地人，都好友善嘅，有位老伯不停同我地Say Hello，又點晒頭咁，好鬼死熱情。膽粗粗跟當地人走左入去間屋，原來超市來的，咩都有得賣咁，不過以丹麥幣算，唔識計，都係D日用品咩特別，最特別算係見到有長槍賣，唔知係咪打獵用嘅呢？最攪笑見到亞酒店丹麥女職員出現，原來佢跟當地朋友開車過來逛下。繼續前行，咦，發現有屍體，對動物有無比興趣嘅小團友仔（小兒）立即上前查看，原來是象海豹，屍體完整無缺，只放在海灘邊，應該是當地居民的守獵品吧，作食用的。即使是夏天，不過天氣如此冷，所以都不需要冷藏，亦無咩異味。

（象海豹。）

再行前多少，看見殺人鯨的屍體， 這個屍體卻是體無完膚了，都食左好多部份啦，剩下都是骨骼。小兒今次更有信心，跑上前去介紹此乃False Killer Whale，因為觀察其背鯕及上鰐大小而得出此結論，非常有信心，very good（不論對錯）！不過最攪笑係2位經常出入街市的團友卻不敢走前靠近喎，因為真係好大味（其實好似D鹹魚味，不過濃烈很多吧） 。

（唔知好唔好食嘅呢！不過好難聞！）

（隨團有小小動物學家，對此殺人鯨向大家做了詳盡的介紹。）

攀上山頭，遠看巨大浮冰後，因為無路行啦，所以便回頭，在村落每家每戶都綁住了很多頭愛斯基摩犬(Huskies)，都無吠我地啊，很乖呢。此村4百多人，卻有7百多頭Huskies呢！回到酒店，把行李放回房間後，約六時就吃自助餐晚餐了，天還是很光亮啊！今晚D雪榚好好味啊，我吃了4大碗呢，今次肥死咯！

（可愛的Husky!)

(與村落合照吧！）

晚飯後我跑了出去影日落美境，有團友仔買 Souvenir買post card，各有所好啦！

（學5D3廣告照之一。）

（之二）

（之三）

亞女職員話前幾天看見極光，今晚大家都不敢熟睡，居然係11至12時真係出現啊！8月份都見到極光，我們真幸運呢，不過有些團友早睡，拍極門都唔醒，無計（佢地之前都見過，除了小團友啦）。雖然比不上當年係亞拉斯卡的極光那麼美，時間亦不長，沒月當時的變化多端，不過都超開心！大約1時，天開始多雲，看不見了，只好去睡了。今天感覺都好充實！

（最初影得唔好！）

（後來好少少，不過就開始多雲影唔到！）

第十二天，2013-08-22，星期四： Reykjavik > Kulusuk, Greenland  - Part 2 (天晴)。

Greendland Kuluskuk比冰島時間再遲3個小時，到達時是當地上午10時05分。一落機出機場，就有酒店職員來迎接我地，好親切呢（哎吔，忘記了她的名字，有團友仔記起就提提我啦）！她是剛畢業的丹麥女生，第一份工，整家酒店的接待、分配房間，早、午、晚的自助餐負責執拾碗碟， Souvenir shop要收錢接待，並要開車接送旅客往返機場，兼顧酒店櫃枱工作等，全由她一個人包辦，超人！雖然如此，但她仍然經常笑容滿面，對客人有說有笑，那種敬業樂業的精神，真值得學習（可能是剛踏足社會的年青人那團火吧，不過也非常值得我們專敬！）。她說在此做了快2個月，瘦了不少呢（梗係啦，咩都一腳踢！）。

（衝上雲霄......完畢！）

（梗係要與Super women合照!)

她說，可以車我們去酒店，也可選擇走15至20分鐘的路程去酒店，並說沿途風景很美麗等等。我地梗係自己行去酒店啦，一來當時約11時左右，又未食得午餐，Check-in時間又未到，又坐了3小時機，鬆下都好，所以把行李放上車後給職員運送後，就開始起行了。

（沿途都很美！）

（真係大魚大肉喎。）

行去酒店路程不遠，沿途風景很美，好天有點微雨，很舒服的感覺。去到酒店還未吃午餐，就走左去海邊，嘩！有好多浮冰係海灘呀，有D好大舊添，正呀，大家都衝晒去影餐飽！玩左影左好長時間，要去食自助餐啦，都有好多野食吓啊，無想像中咁荒涼淒慘，重大魚大肉有蝦添，正呢！所以住1晚包3餐唔駛趕頭趕命係值得嘅（比左＄梗係咁講！）。不過呢，同機同行又真係有一班強國團，都好擾樣吓，好彩佢地係即日團無過夜，唔係今晚實好嘈好煩（不過變成到我地可能係最嘈嘅一班人，嘩哈哈！）。

（與大舊冰拍照先！）

（好大舊冰呢，其實有D梗大！）

寫住咁多，今天還有最後一個Part 3。

第十二天，2013-08-22，星期四： Reykjavik > Kulusuk, Greenland  - Part 1 (天晴)。

今早坐10點05分機去格陵蘭，所以一早7：30 離開Summerhouse，出發往Reykjavik內陸機場。未夠9時就到達，機場門口有停車位唔駛錢任泊，非常好。係機場check-in完就開餐，三明治早餐！呢個內陸機場好簡陋，無他，只係飛去冰島3個大城市、3個小城市（其實都係好小嘅鎮仔）、Faroe Islands和格陵蘭的5個城市，講講下都唔少咁喎。

（內陸機場，好大風，假髮都會吹Luc。)

我地諗住有D交帶，因為Summerhouse屋主唔多識英文，我地又唔識冰島文，所以係機場以英文交談搵左個華藉冰島少女（機場雜貨店售貨員）用冰島文打電話比屋主講聲我地已經離開，點知屋主以為我地整爛D咩，重同售貨員雞啄唔斷咁講左好長時間，好攪笑。好啦，終於上機啦，係螺旋槳細飛機，之前坐過好多啦，唔驚。我地坐Iceland Air，飛機有食物、飲料，比起由芬蘭來冰島個程咩都無好好多啊，不過Iceland Air遲D都不再提供啦，因為佢地做緊問卷調查，內容係話唔再提供食物！

（牛角飽，朱古力，我選了Diet Coke一罐!)

（吹到頭Fing Fing!)

坐左約3個小時機就到達，沿途無娛樂訓覺居多。Kulusuk機場更加簡陋，掂行掂出就出左機場啦。我地Book左係Greenland Kulusuk酒店住一晚，包今天中午、今晚晚餐、明早早餐三餐，比起即日來回係左貴D，但包住包3餐覺得貴些少又好似好底喎，一來唔駛趕頭趕命，又可以多D時間拍照憂悠行，雖然沒有Day tour的領隊介紹，又無愛斯基摩老人打鼓表現（不過好多旅遊書都說可觀性很底），但是後來發覺原來Greenland的自然風景很美，半夜重看見極光添，賺晒啦， 所以覺得超值喎！（成個旅程我最喜愛格陵蘭啦，比冰島更天然、更方荒涼，My favorite，不過我D同事仔話好似荒蕪過頭唔多like喎，各有所好啦！）

( Kulusuk機場雖然簡陋，但都有D野睇下，例如北極熊皮。）

（我最喜愛大自然！）

寫住咁多先，今天行程重有Part 2。